EgypToz: الغيره القاتله

Monday, November 01, 2010

الغيره القاتله

لو كان القتل حلال لإخماد نيران الغيره لكنت قتلته

صحيت النهارده كفته مشويه من حفله امبارح...الحفله اللى انا و زميل السكن دى جى كووك عملناها لزميلنا يوو الجديد فى السكن...حفله فجرت كل الاحقاد و الغيره القاتله اللى مازالت بتتفجر داخلى حتى كتابه هذه الكلمات

البدايه كانت من 6 اسابيع...لما ارمى بوى اللى كان ساكن معانا فى الشقه تعثر فى دفع ايجار الشقه للمره العاشره...فقرر دى جى كووك طرده من الشقه و عمل اعلان بحث لساكن جديد...و بعد ما ارمى بوى اتطرد لقيت دى جى كووك بيقول لى إن فى ساكن جديد خلاص حايسكن من اول اكتوبر...قولت له طب مش كنت تاخد رأيى الاول...فى اللحظه دى تذكرت ايام المعاناه من سنه لما كنت بادور على شقه و كل يوم اروح اعمل من اربعه لست انترفيوهات و مقابلات مع سكان كل شقه علشان اكون سعيد الحظ و افوز بالسكن معاهم...عاوزين يشوفوا مين اللى حايسكن معاهم...جنسه ايه و دينه ايه و فكره ايه و ثقافته ايه...كل مره كنت باترفض...يمكن علشان شكلى معفن...أو علشان مجنون من سرايه المجانين...أو علشان ارهابى عربى مسلم...أو لون بشرتى داكنه تدل على عدم استحمامى إلا كل عيد...لدرجه انى كنت لازم اسكن مؤقتا فى شقق قذره لشهور حتى وجدت الشقه اللى أنا ساكن فيها بالحظ و توفيق من الله...مش وقته احكى اتقبلت ازاى بس كان كوسه بالمختصر المفيد...كو سه...المهم قررت إن لما  حد جديد حايسكن فى شقتى لازم اتلذذ فى عمل مقابلات مع الراغبين فى السكن و اسألهم اسئله محرجه و اذلهم و ارفض طلباتهم فى السكن زى ما اتعمل معايه

ازاى زميلى فى السكن يقبل بسكن واحد جديد اسمه يوو من غير ما ياخد رأيى و بدون تردد والا تفكير...ده اللى كان محيرنى...ده اللى كان حايجننى...ازاى الفرصه دى تروح منى...ازاى يجى واحد يسكن معانا من غير ما اعرفه و اشوفه...قال لى هو جاى علشان تتعرف عليه و لو معجبكش ممكن نلاقى اى طريقه دبلوماسيه نزحلقه بيها...بس هو حايعجبك

يوم المقابله فتحت الباب جالى زغطه من المفاجأه...لقيت واحد وسيم عضلات شبه الموديلز و ممثلين السيما واقف بيمد ايديه و بيقول بصوت رجولى عميق أنا يوو و جاى اتعرف عليك...دى جى كووك كلمنى عنك كتير...قولت له اتفضل...قعدنا احنا التلاته فى اوضه دى جى كووك و ابتدى يحكى انه فى بكالوريوس طب اسنان و جاى من فرنسا بعد ما درس سنه هناك ... و... و...و لقيت دى جى كووك بيجيب عقد الايجار و بيبصلى علشان اديله الاو كيه

اوكيه...حاقول ايه...بصراحه ما فيهوش حاجه تتعاب...الفكر ده جه اكيد لآلاف الناس اللى قابلته فى حياته

و جه اول اكتوبر و لقيت يوو جاى باحدث نوع عربيه شبابى مع اصحاب مش عارف اعدهم و جايب العفش من فرنسا و كل واحد من صحابه شايله حاجه...اللى شايل الدولاب..اللى شايل السرير...اللى شايل التلفزيون...و نزلت اساعد قال عامل فيها راجل...و بمنتهى السهوله و اليسر اوضته خلصت فى يوم...و بصيت عليه هوه و حبيبته اللى كانت واقفه بتتفرج على العمليه و بتشرب سيجاره... و تذكرت لما جيت انقل هنا و المعاناه اللى عانيتها و ازاى شلت العفش خمس ادوار لواحدى و العرق و البهدله و ازاى إن الموضوع عندى اخد اسابيع... مش يوم...يوم يا يوو

غرت لما شوفت ازاى حول غرفه الساكن القديم إلى مملكه فى غايه الجمال...غايه الشياكه...و بغير لما اسمعه و هوه بيذاكر بمزاج على اغانى الجاز اللى مشغلها...و بغير اكتر لما باسمع ضحكاته و ثرثراته مع صاحبته و همه مع بعض فى الاوضه بالليل...غيره بتقطع شرايين قلبى و امخاخى

قولت علشان الغيره تروح اعمله عمل كويس...قولت له عاوز اعملك حفله استقبال يا يوو...يعنى ايه رأيك أنا و دى جى كووك و حبيبته و أنت و حبيبتك نخرج نروح حته بره مثلا أو نعمل حفله صغيره هنا بمناسبه قدومك للشقه الجديده...قال قشطه نعمل حفله هنا يوم الاحد الاسبوع اللى جاى مع الهالويين بارتى...كوول يا مان...قشطه جدى

اول امبارح روحنا أنا و هو و دى جى كووك نشترى اكل و شرب و خمره و ويسكى و مستلزمات الحفله...قولت له عاوزين نعرف كام واحد كده حايجى علشان نعرف نجيب كميه اكل و شرب قد ايه...يعنى انا مثلا قولت لزميله ليه و مم...و تلاته قالولى مش حايقدروا يجوا...يعنى اتنين من ناحيتى حايجوا شوور...لقيت يوو بيقول لى ...اتنين بس؟...انا عملت اعلان على الفيس بووك...و تقريبا تلاتين واحد من صحابى حاييجوا...و لقيت دى جى كووك بيقول إن عشرين واحد حايجوا من ناحيته...اتصدمت...و حاسيت بإنى عاوز الارض تنشق و تبلعنى...و شكيت إنى عندى اصحاب...و شكيت فى وجودى  الاكزيستنسياللى...و اشترينا كراتيين من الأكل و الشرب و أنا مش مصدق لسه...و يوو فضل طول الليل اول امبارح يطبخ بمهاره و يفنن فى الاكل...و أنا الغيره عماله تفور فيه...عماله تفور...نافور

و يوو فضل امبارح من الصبح يحضر للحفله...و دى جى كووك يحضر فى معداته الموسيقيه...و عزم دى جى لوكاس فوه مع فرقته علشان يعمل هوه موسيقه كمان...و الناس ابتدت تدخل البيت الصغير الضيق...و الاصحاب عمالين يتوافدوا...و الشقه ابتدت تتملى...و الموسيقه الصاخبه عماله تهز الحيطان و ارجاء المكان...و الناس عماله تشرب و تتكلم...تاكل و تتكلم...و ترمى فتافيت فى الارض

مش عارف ليه تذكرت افلام المراهقين الامريكيه امثال اميريكان باى...بنات عماله تتفعص...و ناس من كتر الثماله نايمه على الارض...طابور على الحمام... الشقه صعبت عليه...ناس عماله تدخل من الشارع و مش عارف مين جاى من طرف مين و مين مع مين...حيص بيص...عك مكس شيك...ولاد نايمين مع بنات على سريرى...ناس غريبه عماله تلعب فى اوضتى...تفتح دواليبى...و تستكشف فانلاتى و كيلوتاتى...حاسيت بدوخه...و البيت اتملى دخان...هوه الحشيش ريحته ايه...و لقيت يوو بيرقص مع حبيبته فى قمه السكر و النشوه...و الا هوه هنا...استمتاع إلى النهايه...و بدأت فكره القتل
الساعه اربعه الفجر فضلت انفض الشباب اللى نايمه مريله على سريرى...و مرجعه على الارض... ناس نايمه فى المطبخ... ناس نايمه فى الحمام...قولت طظ فيكم جاتكم القرف و روحت نمت على الكنبه

لما صحيت النهارده من الغيبوبه...و لسه بواقى الناس متبعثره فى اوضتى... و واحد بيلعب فى التلاجه الفاضيه بيدور على هم هم...عرفت إن الكلام اللى بنعلمه لولادنا مش الحقيقه...إن "الجمال مش فى الشكل...الجمال فى الروح"...ده كلام فارغ...إن الجمال الشكلى و الجاذبيه بيسهلوا الطريق للواحد فى حياته بطرق غير مباشره من غير ما يحس...زى ما خلله يوو يبقى فى الشقه بدون إى مجهود...فما بال الواحد لما يكون عنده جمال الشكل و جمال الروح...و طيب...و مهذب...المزز حتتهافت عليه...الاصحاب بالمئات...المعلمه فى المدرسه حتتأثر من غير ما تحس و تعطيه درجات اعلى من اللى يستحقها...فما بالك لو فعلا يستحقها...و بالمجموع العالى حايدخل كليه القمه...و حاينجح بمساعده ثنائى جمال الروح و الشكل...و فى العلاقات حاينجح...و لو فشل هناك مئات الفرص امامه للنجاح...و لما يتخرج هوه اللى حياخد الوظيفه...علشان مثالى من حيث الشكل و الروح و المخ و و و ...و حاينجح فى معظم مراحل حياته و و و...يعنى لو فشل كطبيب اسنان و انا لا اظن طبعا...حاينجح كممثل...كمذيع...كبياع ملابس حريمى...لإن زمنا زمن "الجاذبيه مفتاح النجاح و السعاده"...البت المزه اللى شكلها حلو حاتنجح فى امتحات الشفوى طبعا...و لو سقطت فى التحريرى حتنجح برضو...و هى اللى حاتتجوز...و هى اللى لو قدمت على وظيفه سكرتيره حاتاخدها...و لو عاوزه تفوز بدور البطوله فى الفيلم حاتبص للمنتج و تبقى البطله...يعنى يا عزيزى لو شكلك زباله و اصلع و بنضاره...امشى جنب الحيط و اسكت...هششش...اخرس

يوو عنده كل حاجه...يوو معاه كل حاجه...يوو عايش كل حاجه...و أنا غيران منه

علشان انا شكلى قرد اقرع من بولاق الدكرور... يبقى لازم اتجوز ملكه جمال العالم... علشان يبقى فيه امل احسن النسل...و الشكل...بس الاول لازم اقتل الغيره اللى فيه...غيرتى القاتله...قبل ما ارتكب جريمه و اقتله النهارده بالليل

6 comments:

أحمد said...

الحقيقة حاليا اكيد فيه شباب كتير هنا في مصر بيشعروا بالغيرة اتجاهك

وبعدين يا مان خد بالك لحسن يوو
يلاقي الفيديو والصور دى

Wild at Heart said...

إنت معاك حق، بس لو ماكانش يوو واثق في نفسه وشايف إن شخصيته جذابة وحاسس إنه ناجح في حياته إلخ ماكانش حيبقى له معارف كتير كده.
يعني لو أنا قلت على نفسي إني معفصة وقورتي كبيرة وجلد على عضم ومفيش أي حد ممكن يبص لي، ده الإحساس فعلاً اللي هيوصل للناس اللي حواليا، حتى لو ماقلتهوش.

WS said...

Wild at Heart
بس ايه اللى بيجى الاول...الثقه فى النفس و الا الجاذبيه و الشكل...اقول لك الشكل طبعا...و الثقه فى النفس بينتج طبيعى من ردود فعل الإخرين على شكلك

العين لما بتشوف جمال بتقول لصاحبها تحب اللى شافته

واحد يقول لك هوه اول حاجه بتجذبك فى البنت ايه...يقول لك شكلها

Anonymous said...

خلينى أقلك حاجة بسيطة : محمد أنور السادات رئيس مصر لم يكن ذو الشكل الوسيم ولا مفتول العضلات ومع ذلك كان شخصية جذابة خاف كارتر على شعبيته منه فى أمريكا وكان ناجح ومحبوب بره قبل جوة .. الأمثلة كتيرة لشخصيات عامة ناجحة ومحبوبة وكان لا عندها شكل جميل منسق ولا أى حاجة من اللى عند سى يوو وخد عندك غاندى كمثال، العبرة بجاذبية الشخصية والروح اللى تخلينى بدون ماعرفك أحب أقعد معاك وإستمعلك ويطربنى كلامك

Anonymous said...

يوو لو عرف الحقيقه هيحسدك
انت اتولدت لقيت لا الله الا الله على طبق من فضه و بيدوهالك فى فمك بمعلقه دهب
لغة القران هى لغتك الاصليه
انت عارف انت فى الدنيا ليه و ايه الهدف منها حتى لو كنت بعيد زيى عن تحقيق الهدف ده
يوو ممكن قوى زى معظم الناس البره مش فاهم
هو هنا ليه و ممكن تنتهى بيه الدنيا و هو منتحر زى كتير بره و عندهم كل حاجه
انا لما قريت التدوينا بتعتك فكرت
و لقيت ان انا و انت ممكن يكون فى واحد مشلول على كرسى متحرك بيعملها على روحه و مبعرفش ينضف نفسه بيحسدنا احنا الاتنين و بيحسد يوو و نفسه يكون زينا وهو فى يوم صعب جدا ممكن هيكون فرحان قوى قوى بالحصله فى الدنيا و احنا ممكن نتمنا انحنا لو كنا مكانه على الكرسى ده فى الدنيا
عارف لو تعود نفسك على انك ترضى و متحطش فى دماغك الناس التانين هتستريح قوى
ثانيا اقترحت حفله شوف كام واحد جه فيها
و كام واحد عك وشرب و سكر كل دول تفتكر هينولك منهم وجع الدماغ فى الاخره ولا ايه
انت لو تشوف النعم الربنا ادهالك و اجمل نعمه فيهم نعمة الاسلام هتلاقى نفسك محظوظ ان انت اتولدت مسلم
يلا ياعم ربنا يهدينى و يهديك و ميموتناش غير و هو راضى عنا و مسامحنا
سلام

عمر عبد المجيد said...

على فكرة انا مش عارف افتح الفيديو و عموما اوعى غيرتك تقتلك انت الاول