EgypToz: إسلام يوحانيس

Friday, February 05, 2010

إسلام يوحانيس


الكعبة الشريفه على بعد كيلومترات من منزلى...و بالرغم من ذلك لا اذهب إلى الصلاه هناك

المسجد اللى باصلى فيه الجمعه الآن بيبعد عن منزلى تقريبا ساعه بالعجله…و هو المسجد الوحيد فى المدينه...و بالرغم من إن الذهاب إلى صلاه الجمعه بالنسبه لى حاجه مقدسه…إلا إنى كنت خايف فى البدايه من ترك العمل بحجه الصلاه…مش عارف... الناس اللى فى الغرب ممكن يفهموها غلط…هروب من الشغل...فتره راحه...العمل له وقته و العباده لها وقتها...ليه ما تصليش بعد العمل...ولكن بالعكس...لم يسألونى فى أى شىء و الحمد لله احترموا رغبتى فى الذهاب إلى صلاه الجمعه و وافقوا على تركى للعمل لمده ساعتين اذهب فيها للصلاه ثم ارجع لأكمل العمل مره اخرى

المسجد كان مخزن لمصنع للخمر...و من ثمانيه سنين و انا لازم اصلى الجمعه فى المسجد ده لما اكون فى زياره للمدينه...و شاهدت المسجد ده بيكبر سنه بعد سنه و اصبح هناك عاملين فيه و مدرسه للأطفال و يعقد فيه الآن ندوات و دورات هامه

انا زى ما الواحد بيقول من البيت للمسجد و من المسجد للبيت عمرى ما كنت باحب اختلط بالناس اللى بيصلوا فى المسجد...مع إنى كل يوم جمعه باشوف نفس الوجوه بس زى المثل ما بيقول...كل ما تدى ضهرك للترعه...عمر البلهارسيا فى جتتك ما ترعى

من الأخر انا مع نفسى و ربنا و ماليش دعوه يا عم بحد

لحد ما فى يوم من الايام دخل المسجد ملاك

صلى صلاه تحيه المسجد و استمع لخطبه الجمعه و صلى معانا الجمعه و مشى

كل يوم جمعه فى لحظه دخوله من باب المسجد بالجلباب الأبيض اللى لابسه فوق القميص و البنطلون الجينز...الناس لمده لحظات لا تلتفت للخطيب اللى على الممبر و تبص على الملاك...الملاك يقول بهمس السلام عليكم و الكل فى المسجد يقول و عليكم السلام و رحمه الله و بركاته

لا يتكلم مع احد و لا احد يتكلم معه

و عدت اسابيع و شهور و انا اسأل نفسى مين الملاك ده...بيجى المسجد ليه...و هل بيفهم اللغه العربيه...و هل يستمع فعلا للخطبه... و هل هو من البشر

لما بيصلى باحس اكنها اخر صلاه حايصليها فى حياته...منتهى التركيز و الخشوع...اكنه من العالم الآخر...بالرغم من إنه بيصلى تحيه المسجد زى الناس التانيه اللى فى المسجد...بس صلاته شكلها مختلف...شكلها عباده...اما صلوات الناس التانيه فشكلها حركات جسمانيه روتينيه

الملاك اظن يسمى يوحانيس

بعض الشائعات تقول إنه جاسوس مدسوس من الدوله ليراقب كل ما يدور فى المسجد...و إنه بيفهم و بيعرف يتكلم عربى كويس...و إنه متدرب على إنه يمثل إنه مسلم بيصلى فى المسجد...و إن فى ملابسه جهاز لتسجيل الخطبه...و إنه عميل لدى اجهزه الأمن الاوروبيه للكشف عن الارهابيين...و علشان كده معظم الناس بتخاف تتكلم معاه و بتتجنبه من باب الحذر

أنا احساسى بيقول غير كده...ممكن يكون تعرف على الدين الإسلامى و اقتنع به و دخل الإسلام و بيصلى الجمعه زى أى مسلم

أو ممكن يكون لأب عربى مسلم و أم اجنبيه و علشان كده شكله اجنبى

مره صليت الجماعه جنبه و سمعته فى الصلاه و هو بيدعى بلغه عربيه مكسره

بعد صلاه الجمعه بيقعد يصلى و يدعى بس عمرى ما شوفته بيقرأ القرآن...و هنا تيجى نظريه إنه ممكن يكون ما بيعرفش يقرا عربى

باحس إن فيه طاقه غريبه و اقتناع و حب رهيب فى تأديه الصلاه ما شوفتهاش فى أى واحد تانى بيصلى فى المسجد...أكنه طفل جديد بيكتشف الصلاه لأول مره...و فكره الاتصال بالخالق سبحانه و تعالى...و مؤمن بالعباده اللى بيقوم بيها

مش عارف ليه أنا سعيد جدا إنه مسلم مؤمن...و حزين جدا إنى لا اهتم بباقى المسلمين العرب اللى فى المسجد...اكن عاوز الشعب اللى أنا عايش معاه الوقتى هو اللى يبقى مسلم بدل الشعب بتاعى اللى فى مصر

العرب اللى فى المسجد بيفكرونى بالأمه العربيه...بيصلوا بزهق فى المسجد...تعود...تأديه فريضه و خلاص...و أنا زهقت من زهقهم

لو الخطب اللى فى المسجد دى اتسجلت و اتزاعت...أنا حاخجل منها بالتأكيد...تضييع للوقت...اكن جبت المسجد التيك أواى اللى فى مصر و حطيته فى اوروبا

خساره...الإسلام عندنا بقى فى غساله فول اوتوماتيك...عمال يلف يلف يلف فى نفس الدوامه من غير نهايه...و يوحانيس اكنه فيرجن جديد من الإسلام...نسخه نظيفه من الإسلام من غير فيروسات...كل ما الإمام يتكلم نفسى اقوم و اروح ليوحانيس اسد ودانه من الكلام الرجعى و الهدام اللى بيتقال بإسم الإسلام...و ساعات اتمنى إنه ما يكونش بيفهم عربى علشان ما يسمعش اللى بيتقال من على الممبر...و كل يوم بقيت ابص اطمن هل يوحانيس جه المسجد و الا لأ...أنا لو لسه داخل فى الإسلام و سمعت الكلام ده و شوفت تصرفات العرب اللى فى المسجد اسيب الإسلام عالطول

نفسى اتكلم مع يوحانيس و اقول له عن الإسلام الحقيقى...دين الرحمه و المغفره و تقبل الآخر...دين الأخلاق و القيم و المحبه و الأخوه و الوسطيه...مش طول الوقت إمام مختلف يطلع يتكلم من على الممبر و يقول إننا فى بلاد الكافرين...و ربنا يسفك بيهم الأرض و ييتم اطفالهم...إمام متشدد فى كل التعاليم الإسلاميه...إمام بيحسسنى إن دين الإسلام دين من عصور الجاهليه

ليه ما اتكلمتش مع يوحانيس...هذا هو السؤال

أنا باحمد ربنا إنى اتولدت مسلم...و إنى عايش فى مصر علشان كل فتره باشتاق إلى البيت الحرام...و لكن تأتى اللحظات التى اود فيها أن أكون اجنبى ملحد آمن و دخل فى الإسلام

و من يوم الجمعه اللى فات و يوحانيس ما جاش

مرت شهور و ما فيش حد جديد بعد يوحانيس دخل المسجد...و اتوقع إن مافيش حد حايجى بعد إيمان يوحانيس من اليوم

25 comments:

Anonymous said...

تعرف فكرتنى بالشيوخ اللى بيجوا على الفضائيات الجديده المصريه اللى بيتكلموا عن العذاب والنار بس وماما بتحب تشوفهم انا بسيب التلفيزيون لما اشوفهم ياريت يكون كل اللى بيتكلم عن دين الاسلام يتكلم بوسطية الرسول عليه الصلاه والسلام

zeze

WS said...

zeze

الفكره إنى مكسوف من شكل دينى اللى بيتشرح من على الممبر...الحاجه الغريبه هنا إنى ما يهمنيش العرب اللى فى المسجد يسمعوا الكلام ده...يمكن علشان اتعودوا عليه خلاص و صعب إنهم يتركوا الدين الإسلامى...لكن اللى يهمنى هو يوحانيس لإنه جديد على الدين الإسلامى...و لإنى عاوز ابقى فخور بالدين بتاعى ادام أى حد...مش ابقى خجلان مع كل خطبه جمعه...بقيت حاسس إن الدين الإسلامى بقى فى الزمن ده منتج محتاج شركه دعائيه اكثر احترافا و ابتكارا من الاسلوب القديم فى الدعوه...أنا غيور على دينى اوى و نفسى اقدمه فى احس صوره

Anonymous said...

طب ماتحاول انت تحضر لخطبه عن الاسلام شوف مثلا السايت دا بيتكلم عن الاسلامwww.miraclesofthequran.com
فيه كلام جميل عن اعجاز القرأن و مش لازم ف نفس المسجد لومحدش هيديك فرصه تقول الخطبه فيه شوف ولو مسجد قريب من شغلك حتى لو صغير
تفدر تخطب وتتكلم احسن انا شايفه ان الخطبه علم متكامل مش عن الدين بس لازم اللى يقولها يكون مثقف وعنده هدوء وبعد نظر

zeze

Anonymous said...

نفسى اتكلم مع يوحانيس و اقول له عن الإسلام الحقيقى...دين الرحمه و المغفره و تقبل الآخر...دين الأخلاق و القيم و المحبه و الأخوه و الوسطيه...مش طول الوقت إمام مختلف يطلع يتكلم من على الممبر و يقول إننا فى بلاد الكافرين...و ربنا يسفك بيهم الأرض و ييتم اطفالهم...إمام متشدد فى كل التعاليم الإسلاميه...إمام بيحسسنى إن دين الإسلام دين من عصور الجاهليه

................

وهو برده الدين دا اللى خلاك تكتب البوست اللى فات اللى منور المدونة

!!!!!!!!!

للأسف احنا بنبقي واعيين جدا بأخطاء غيرنا لكن أخطاءنا ولا بنبص ليها

الدين قبل ما يكون صلاة فهو التزام منى في كل أفعالى وكل كتاباتى وأى كلمة أتلفظ بيها سواء من فمى أو مكتوبة


"بس" ياريت ما تتكلمشي مع يوحانيس غير لما تكون فاهم كويس عشان ميكرهشي الاسلام بسببك انت

WS said...

أنا مش من الملائكه
أنا من البشر

Anonymous said...

صح احنا بشر


ودى رحمة من ربنا

لان اهم ميزة في البشر ان لهم فرصة يراجعوا اخطاءهم ويصححوها

وميخلوش حاجة تافهة عماله تعد ذنوب عليهم


الذنب اللى اقدر امسحه امسحه فورا

Anonymous said...

يبدو ان اللى بيتكلم شيخ بس كلامه حاد شويتين هى الناس لو اتكلمت بالراحه وبحنية الرسول صلى الله عليه وسلم حيحصل ايه معلش ws

zeze

WS said...

zeze
شكرا على التعليق
بس لازم اقول إنه عنده بعض الحق
و الكلام اللى بيقوله ده عارفه من زمان
بس اللى هو مايعرفوش إن المدونه دى هى المكان الوحيد اللى اقدر اتكلم فيه مع نفسى بصراحه وشفافيه و بكل وضوح
و هى دى الحقيقه
و هو ده أنا
بشر

Anonymous said...

بسم الله

على فكرة يا زيزى انا مش شيخ ولا حاجة

انا بنت


وعادية جدا جدا

ولد شاب : أنا متابعة المدونة من زمان ولانى عارفة ان حضرتك انسان كويس

وعارفة انك عارف الكلام اللى بقوله

بس فيه فرق بين انك تعرف وانك تنفذ

ما كلنا عارفين الحلال والحرام

وانا اول الناس بقع في الذنوب

بس فيه فرق انى اعمل الذنب وربنا يسترنى

وفيه فرق انى اعمل الذنب وربنى يسترنى بردو واروح اجاهر بيه

لمجرد انى مش لاقي حد احكيله ع الذنب بتاعى

!!!!!!!


معلشي بيبان انى اسلوبى عنيف




لكن انت يمكن تكون احسن منى مليون مرة عند ربنا


بس طالما حسيت انى في ايدى نصيحة مش هبخل بيها على حد وبالذات لو كان حد زيك كده مرن وعنده سعة صدر


دا اخر كومنت ان شاء الله

عشان بس متزهقوش منى

WS said...

كومنت أكثر من رائع

و ما حدش زهق منك و لا حاجه

أنا مش قصدى أجهر بالذنب و لا حاجه
لإن أولا ما حدش يعرفنى
ثانيا لإن الهدف الاساسى منه هو إنى ابعد عن الذنب

أنا عارف إن ربنا عالم اللى فى قلبى

حتى لو قلبت المدونه ملهى للفجور

يمكن اسلوبى ساعات بيبقى قبيح شويه
بس أنا اتأسف لو جرحتك بأى كلمه

و شكرا على التعليق الجميل ده

وربنا يغفر لنا كل ذنوبنا

Anonymous said...

طب ماانتى حلوه اهه يارب يتوب علينا جميعا ويتقبل مننا بس احنا كبشر لازم نغلط ولو محصلش نبقى خرجنا عن البشريه نبقى ملايكه وتصدقى ان حتى البشر مابيقبلوش غلطات بعض لكنه رحيم وعمرى مزهق منك ياجميله اكتبى علطول


zeze

Anonymous said...

انا كل قصدى اللى عايز يتكلم عن الدين وماله ياما ناس اسلمت على ايد اصحابها بفضل ربنا سبحانه وتعالى وعشان كده مش لازم الواحد يكون فقيه عشان يتكلم عن الاسلام انا صاحبتى اسلم بفضل الله سبحانه وتعالى على ايدها واحد ايرلندى وهى واحد عاديه جدا لكن بس النصيحه بشويش بتأثر اكتر من النصايح المباشره وكلنا بنغلط ونتعلم لحد مانموت واكتبى كومنت علطول عشان نسمع منك تانى وتانى
zeze

Wild at Heart said...

وهو فين الذنب اللي عمله وبيفضحه في التدوينة؟

Anonymous said...

Ws
انت عارف انى ممكن اكون انانيه لو قولتلك ان كل اللى بتكتبه صح بس انا بستمتع لما بقرا كتاباتك جدا بس زى ما البنت قالت كلنا هنسأل عن كل حرف قولناه او عملناه او كتبناه انا على فكره بقرا كتاباتك لماما بس طبعا فيه حاجات اتكسف اقراها ليها وربنا معاك ويهديك لكل حرف فى رضاه ويبعد عنك اى حاجه وحشه
zeze

WS said...

Wild at Heart
أنا عارف؟اسأليهم

Anonymous said...

Ws
you're free to write what you want and we're free to read what we like, hope your health better

zeze

Anonymous said...

ws
فين موضوع مارس انت زعلت منى ولا ايه ع العموم حقك عليا لو زعلت بس ما تتأخرش علينا
zeze

WS said...

ازعل؟ طب هو معقول حد يزعل من زيزى؟

Anonymous said...

حلو اوى مابتزعلش اكتب بقى علطووووووووووول وبراحتى بقى اى حاجه معاك او عليك

zeze

Anonymous said...

انا حاسس انك بتتكلم بشخصيتين ساعات يا ولد شاب


هارى بوتر

WS said...

بشخصيتين إزاى يعنى يا هارى يا بوتر؟

WS said...

http://twitter.com/egyptoz/status/10381748473

DAS said...

انا زيك كدا برضو نفسي العالم كلو يبقي مسلمين مع اني بسئ ليهم

Anonymous said...

تيب انا ازاي اسجل واتباعك وانت لسه مش بقيت تعمل منشورات ولا اي

Anonymous said...

اسجل ازاي